Patan Krishna Mandir पाटन कृष्णमन्दिर

 ललितपुर जिल्लाको पाटन सहरमा अवस्थित कृष्णमदिर नेपाली शिल्पकलाको प्रमुख आकर्षणको केन्द्र हो । मन्दिरमा प्रयोग भएको कलाकृतिले पर्यटकहरुको आँखा खिच्न सफल भएको यस मन्दिरमा २१ वटा गजुरमात्र रहेका छन् । ई सं १६३७ मा सिद्धिनरसिंह मल्लद्वारा निर्माण गरिएको उक्त मन्दिर प्रस्तरद्वारा निर्मित अत्यन्तै सुन्दर र कलात्मक रहेको छ । काठ र इँटको प्रयोग नै नगरी ढुङ्गामात्र प्रयोग गरेर निर्माण गरिएको यो मन्दिर प्रस्तर कलाको नमुना नै हो । यस मन्दिरको अर्को विशेषता भनेको भगवान् कृष्णको मूर्तिलाई भुईँको तलामा स्थापित नगरी माथिल्लो तलामा स्थापित गरिएको छ । त्यसभन्दा माथिल्लो अर्थात् दास्रो तलामा शिवलिङ्ग र तेस्रो तलामा पद्मपाणि लोकेश्वरको मूर्ति राखिएको छ । नेपाली शिखर र तले शैलीको मिश्रित स्वरुपमा बनेको यो मन्दिरका सम्पूर्ण गजुरहरु चाहिँ धातुबाट निर्मित छन् । यस मन्दिरमा भगवान् श्रीकृष्णको नित्य पूजा हुने गर्दछ भने प्रत्येक वर्षको भाद्र कृष्ण अष्टमीका दिनमा विशेष भजन कीर्तन र पूजा आरधना हुने हुनाले त्यसदिन यहाँ निकै भीडभाड हुने गर्दछ । यस मन्दिरको अगाडिपट्टि रहेको एउटा प्रस्तर खम्बामा गरुडको मूर्ति रहेको छ जसले श्रीकृष्णलाई नमस्कार गरेको देख्न सकिन्छ । यो मन्दिरसहित पाटन दरबार स्क्वायर क्षेत्र नै विश्वसम्पदा सूचीमा सूचीकृत छ । हालको कृष्ण मन्दिर रहेको स्थान मल्लकालमा दरबारकै एउटा चोकको रुपमा रहेको  थियो । जहााँ मध्य रातमा श्रीकृष्ण राधासहित उपस्थित भएर बाँसुरी बजाउँथे तर दिनमा भने देखिँदैनथे भन्ने भनाइ रहेको छ । उनै श्रीकृष्णको दर्षन सिद्धिनसिंहले पाएपछि मन्दिर निर्माण गरिदिएका थिए भन्ने किंवदन्ती रहेको छ ।

स्रोत :नेपालका प्रमुख धार्मिक स्थलहरु  मन्दिरै मन्दिरको देश नेपाल ।

कृपया यस सामग्रीलाई अध्ययन गरिसकेपछि कमेन्ट फलो र सेयर पनि गरिदिनुहोला ।